Uncategorized @gl

‘Conductores Suicidas’ traerán á Estrada a música máis emblemática de Sabina O sábado, 9 de marzo, ás 21:00 horas o grupo tributo de Joaquín Sabina, ‘Conductores Suicidas’, actuará no Teatro Principal da Estrada. O Principal acollerá o concerto da agrupación musical tributo a Joaquín Sabina, ‘Conductores Suicidas’, o vindeiro9 de marzo, ás 21:00 horas. O concerto, dunha duración de arredor de 120 minutos, contará cunha selección das cancións máis emblemáticas de Sabina, como Princesa, Peces de ciudad, Por el boulevard de los sueños rotos, Pirata Cojo, Y nos dieron las diez ou Juana la Loca, facendo un percorrido pola súa traxectoria musical. As entradas para a actuación no Principal serán de 10 euros, para aproximadamente 400 localidades. Poderán retirarse na plataforma de pago de ataquilla.com ou no Departamento de Cultura e no Bar As Tres Portiñas da Estrada. A banda, formada no ano 2020, está integrada por oito músicos e un vocalista, Roberto Ramos, quen destaca por ter unha voz moi semellante ao cantautor, facendo desta banda tributo unha das máis exitosas de España.  

A Estrada congregou a milleiros de asistentes nun dos seus entroidos máis concorridos Os concursos de disfraces e comparsas foron os grandes animadores tanto no casco urbano como nas parroquias. Couso e Guimarei celebraron de novo este ano as súas festas de entroido. A programación pecharase o vindeiro sábado co enterro do Salmón, con saída desde a Porta do Sol ás 19.00 horas. O Concello da Estrada fai balance dos cinco días de festexos de entroido nos cales recibiu a milleiros de visitantes para gozar da diversa oferta de actividades propostas para estas datas. O concurso de disfraces promovido pola Asociación de Hostaleiros da Estrada deu o pistoletazo de saída o pasado venres, enchendo os locais participantes na iniciativa coa maxia do entroido. Tamén durante a fin de semana o Novo Mercada acolleu un baile de disfraces infantil con merenda de balde para os asistentes e a residencia da terceira idade un baile para maiores no que tamén se incluíu a degustación de doces entroideiros. Pola súa parte, Couso recuperou o seu tradicional entroido logo de oito anos cunha xornada cargada de simbolismo na que a comitiva entroideira percorreu a parroquia cos seus vivas e coplas. Non faltaron tampouco os encontros de Correos e Xenerais e a danza tradicional do Entroido do Ulla. O luns o protagonismo recaeu no concurso de disfraces e desfile, que contou coa participación dun total de once agrupacións. Os premios grupais viaxaron todos ao sur da provincia, pois a Comparsa Ciclón de Tomiño fíxose co primeiro premio grazas á súa interpretación de Notre Damme, seguida da comparsa Talismán de Salceda de Caselas a Asociación Cultural Comparsas Luces de Tomiño, en segundo e terceiro lugar respectivamente. Tamén Guimarei gozou o luns dunha xornada repleta de propostas que culminou cunha verbena coas orquestras París de Noia e Finisterre. O martes de entroido, o desfile de comparsas captou a atención do público grazas ás súas referencias a temáticas municipais. Ademais das nove agrupacións, ata catro ANPAS non perderon ocasión de desfilar nunha tarde na que tamén actuou o Padre Xiao, dando paso ao encontros dos Correos e Xenerais.  

Unidade Móbil – Doazón de Sangue O venres 23 de febreiro das 10:00 ás 14:00 e das 16:00 ás 21:00 horas e sábado 24 de febreiro das 10:00 ás 15:00 horas na Praza do Concello. A Axencia Galega de Sangue, Órganos e Tecidos (ADOS) subministra compoñentes sanguíneos a todos os hospitais de Galicia. Cada día, as doazóns de sangue recollidas nos locais de doazón e nas 10 unidades móbiles que percorren os concellos galegos envíanse ás dependencias de ADOS para o seu procesamento, análise e distribución. Cada día os hospitais galegos precisan entre 400 e 500 doazóns de sangue para manter a súa actividade, e a súa colaboración é fundamental. No seguinte código QR encontrará información sobre a doazón de sangue e os requisitos de saúde para participar:  

Aberto prazo para a presentación de candidaturas para o “Premio Honorífico ao Labor das Mulleres do Concello da Estrada 2024” Ábrese o prazo para a presentación de candidaturas para O PREMIO HONORÍFICO AO LABOR DAS MULLERES DO CONCELLO DA ESTRADA 2024. DESDE O 12 ATA O 26 DE FEBREIRO. Pódense consultar as bases e utilizar o modelo de candidaturas nas seguintes ligazóns: Descargar bases. Descargar modelo candidaturas (.odt). Descargar modelo candidaturas (.doc). Animamos á cidadanía a que presenten as súas candidatas xa que se trata de un recoñecemento para as mulleres estradenses que teñan unha traxectoria merecedora de visibilizar e valorar. O premio entregarase nun acto o venres 8 marzo, sobre as 20.00h.

Programa “arteterapia” para persoas con discapacidade intelectual PRAZO DE PRESENTACIÓN DE SOLICITUDES:Do 12 ao 16 de febreiro (ambos incluídos) LUGAR DE PRESENTACIÓN DAS SOLICITUDES:Departamento de Servizos Sociais en horario de 9:00 a 14:00 ou a través da sede electrónica do Concello da Estrada. COMEZO DA ACTIVIDADE E HORARIO:A actividade comezará o 19 de febreiro e rematará o 20 de decembro. (agás o mes de agosto)Realizarase 3 días á semana (luns, mércores e venres en horario de 16:00 a 19:00 horas). DOCUMENTACIÓN QUE DEBE ACOMPAÑAR Á SOLICITUDE: Fotocopia do DNI do/a participante Fotocopia do certificado de discapacidade Descargar solicitude. As persoas participantes en anos anteriores que xa tivesen presentada a documentación, non terán que presentala novamente.  

O Principal acollerá o 21 de marzo a estrea de Go Home, a nova comedia negra de Tito Asorey Protagonizada por David Amor e Josito Porto, a obra trata en clave de humor sobre o turismo e a xentríficación en Galicia A función terá lugar ás 20:30 horas no Teatro Principal da Estrada O Concello da Estrada acolle a estrea da nova representación teatral de Tito Asorey. A obra ten como protagonistas a os actores galegos David Amor e Josito Porto, que farán uso do humor para abordar unha temática de actualidade: o turismo e a xentrificación das cidades galegas. A función terá lugar o xoves, 21 de marzo, ás 20:30 horas, no Teatro Principal do municipio. As entradas xa están dispoñibles para a venda a través da páxina web de Ataquilla. A peza observa a realidade e denuncia as problemáticas asociadas a Galicia adoptando un enfoque en clave de humor. Preséntanos a David, un viaxeiro afeccionado, que experimenta a aventura de pasar unha noite no Cebreiro na que gozará de emocións de grande intensidade. ‘Go home’ é unha produción de Etiqueta Negra na que destacan nomes coñecidos como o do director, Tito Asorey, ou os dous protagonistas, David Amor e Josito Porto. Completan o elenco grandes figuras da dramaturxia galega como José Prieto, José Faro, Laura Iturralde, Patricia Ferreira ou Xabier Porto.

O I Gastrotur do Ulla da Estrada contará coa colaboración de AGACAL co enfoque posto na promoción dos produtos de orixe galega O alcalde, José López Campos, e o director da Axencia Galega da Calidade Alimentaria, José Luis Cabarcos, asinaron un convenio de colaboración co que AGACAL participará na organización de actividades informativas e promocionais sobre o consumo de produtos galegos. Na cita participarán 40 artesáns e artesás alimentarias, sendo, polo menos, 15 deles da comarca. A primeira edición do Gastrotur do Ulla que se celebrará o vindeiro mes de maio na Estrada contará coa colaboración da Axencia Galega da Calidade Alimenticia tal e como o ratificaron hoxe o alcalde, José López, e o director da AGACAL, José Luis Cabarcos, a través da sinatura dun convenio co cal a entidade colaborará na organización de actividades informativas e divulgativas sobre o consumo de produtos con selo galego. No acto da firma tamén participaron Óscar Durán, edil de Promoción Económica, Comercio e Emprego; Lois González, representante de ABANCA; e Cesar González, representante do Clúster de Turismo No marco das actividades promocionais que organizará AGACAL poden incluirse catas, xornadas técnicas de obradoiros, showcookings e xornadas de degustacións. No evento daranse cita un total de 40 artesáns e artesás alimentarias galegas, cunha participación de polo menos 15 profesionais da comarca, coa finalidade de dar a coñecer as súas elaboracións. Esta edición inaugural celebrarase no recinto feiral da Estrada os días 17, 18 e 19 de maio, mesma data na que se celebrará o 50 aniversario da Festa do Salmón, motivo polo cal están previstas diversas actividades lúdicas e formativas arredor deste deporte como obradoiros, exposicións e demostracións da man da Sociedad Deportiva Río Ulla. O obxectivo último do Gastrotur é poñer en valor as singularidades de pequenos concellos á beira deste río a través dunha exposición multisectorial con carácter anual ou bianual relacionada co río Ulla e os sectores da gastronomía, turismo e deporte. O alcalde, José López, puxo en valor a colaboración de AGACAL, na organización do evento “dándolle así maior visibilidade aos produtos galegos e ao fantástico tratamento que fan dos mesmos os profesionais tanto da comarca como de todo o ámbito autonómico”.

A Estrada reforza o seu compromiso co deporte coa acollida do Campionato Galego junior e o torneo Concello da Estrada de Judo O Campionato de Judo do Concello da Estrada contará con maís de 400 inscricións e terá lugar o domingo 11 de febreiro. Ademais, o Campionato Galego Junior (Sub 21) contará coa participación de 150 judocas de 24 clubs, e celebrarase o sábado 10 de febreiro. O Concello da Estrada ratifica o seu compromiso cos eventos e actividades deportivas a través da acollida de dúas citas de referencia no judo base como son o Campionato de Judo do Concello da Estrada e o Campionato Galego Junior Sub 21. O Campionato Galego Junior será a primeira cita, celebrándose o sábado 10 no pavillón Manuel Coto Ferreiro. A cita terá lugar de 16:00 a 20:00 horas. A participación para a competición será de 150 deportistas desta arte marcial, que ademais, representarán a un total de 24 clubs. A competición é clasificatoria para o Sector Oeste do Campionato de España Junior Sub 21 e funcionará cunha eliminatoria directa con repesca dobre cruzada, realizándose un combate para lograr o bronce. Por outra banda, o día seguinte, domingo 11 de febreiro, tamén no Coto Ferreiro, celebrarase o VII Campionato Infantil de Judo Concello da Estrada, que terá cinco categorías: a Biberón (para nados no 2020), a Pre-Benxamín (2018/2019), a Benxamín B (2016/2018) a Benxamín A (2014/2015) e a Alevín (2012/2013). A competición contará coa participación de clubs de toda a xeografía galega e portuguesa, incluíndose o; Judo Club BASE; o Judo Club Hércules; a Escola Judo Club, o club San Francisco – Teo; o Colexio M. Peleteiro; o Vilas Alborada, o Terras de Santiago; o Baixo Miño, o J.C. Pontevedra, o J.C Campolongo; o J.C. Senín; o Senra Vilagarcía; o LUGOKAN; o Juviana; e o Juliana. O horario das contendas será polas mañás, de 10:30 a 12:00 horas e polas tardes, de 16 a 17:30 horas. Na presentación das probas, o alcalde, José López Campos, puxo en valor o crecemento do judo como un deporte cun “arraigo cada vez maior no catálogo deportivo estradense”, e tamén reafirmou a importancia de “dispor dunha sólida infraestrutura deportiva coa que confirmar A Estrada como un núcleo deportivo no ámbito autonómico, infraestrutura que moi cedo se ampliará co novo módulodeportivo cuberto, o cal mellorará substancialmente as condicións para as diferentes prácticas deportivas”.

A Estrada será unha das paradas da última xira de Moncho Borrajo logo de 50 anos de traxectoria O Principal acollerá o espectáculo ¡Se Acabó! o venres 22 de marzo ás 21.00 horas. As entradas poranse á disposición do público desde este xoves, 1 de febreiro, e poderán adquirirse tanto no departamento de Cultura como no portal ataquilla.com Logo de máis de 50 anos facendo rir polos milleiros de escenarios de toda España, Moncho Borrajo di adeus co seu último espectáculo, ¡Se acabó!, un show cargado de humor, tenro, divertido e moi especial. ¡Se acabó! son 90 minutos de humor con algún dos seus mellores textos, algunha cousa nova e un final do máis sorprendente. Deste xeito, o polifacético artista chegará ao Teatro Principal da Estrada o venres 22 de marzo ás 21.00 horas nunha xira que comezou en Vigo e que percorrerá cidades como Zamora, Valladolid, Sevilla, Córdoba, Burgos ou Elche. Dita actividade está enmarcada na programación de primavera que a área de Cultura presentará ao longo do mes de febreiro. As entradas poderán mercarse na web ataquilla.com ou no departamento de Cultura do Concello da Estrada a partir do xoves día 1 de febreiro. O prezo por entrada será de 10 euros.

A Estrada apoia unha nova adscrición coa finalidade de reducir a saturación no IES Antón Losada e promover a formación profesional no centro O Concello da Estrada explicou a través da concelleira de Benestar Social, Igualdade e Educación Social, Amalia Goldar, a proposta da Xefatura Territorial da Consellería de Educación de Pontevedra consensuada cos centros de ensino estradenses, para a adscrición nestes, a cal ten por finalidade reducir o alumnado no IES Antón Losada a través da supresión dos estudos de ensinanza secundaria no mesmo coa finalidade de promover a formación profesional e equilibrar o fluxo de estudantes nos outros institutos. A medida, cuxa entrada en vigor está prevista para o vindeiro curso académico, 2024-2025, suporá que o alumnado de primaria do CEIP de Figueroa curse a secundaria no IES Nº1, recinto que deste xeito aumentará o seu número de alumnado e permitirá unha maior capacidade de subsistencia, mentres que os nenos e nenas do CEIP do Foxo e o Cabada Vázquez serán adscritos ao IES García Barros. Ademais, dita medida non afectará á mocidade que cursa ensinanza secundaria no IES Antón Losada Diéguez xa que poderán rematar ditos estudos no centro. Dita adscrición xa conta con todos os informes favorables dos diferentes departamentos involucrados e na actualidade restarían trámites coa Consellería de Educación da Xunta de Galicia para a súa posta en marcha definitiva. A adscrición non suporá a obrigatoriedade de realizar os estudos nos centros que correspondan en base á mesma, xa que tal e como marca a lexislación vixente as familias terán a potestade de matricular ao alumnado no centro que consideren, aínda que a prioridade será dos alumnos adscritos no seu correspondente centro. A edil, Amalia Goldar, mantivo reunións coas ANPAS dos diferentes centros educativos para trasladarlle esta proposta, a cal non implicará modificacións nin no servizo de transporte nin nos horarios de asistencia aos centros. Ademais, un factor a ter en conta neste sentido é a proximidade dos mesmos, o cal provoca que non haxa apenas modificacións nos desprazamentos. Tal e como sinalou, a responsable de Educación, “a finalidade detrás desta medida é aliviar o alto número de alumnado que estuda no IES Antón Losada, ao mesmo tempo que se equilibra no do resto de centros de secundaria”. Ademais, fai fincapé en que “desconxestionar o Antón Losada achegaranos á materialización dun dos nosos grandes obxectivos en materia educativa; convertelo nun centro no que se imparta unha ampla formación profesional que lle garanta tanto ao estudantado estradense como ao de concellos da contorna unha oferta diversa para poder formarse cerca dos seus fogares, sen necesidade de realizar desprazamentos a outras localidades como Santiago de Compostela ou Pontevedra”.