Cultura
A Exposición
Casa das Letras. A Estrada Do 3 ao 17 de marzo
Mulleres Valentes é un proxecto de Rosa de Cabanas, que xurdiu como consecuencia dun reto persoal iniciado en xaneiro do ano 2021, que consistía no compromiso de publicar un debuxo cada semana durante un ano, coa intención de explorar técnicas gráficas e saír do estilo máis coñecido da ilustradora.
Ese debuxo semanal publicado os domingos en redes sociais comezou cun retrato de Xela Arias, escritora homenaxeada ese ano no Día das Letras Galegas, e continuou cos de outras mulleres máis ou menos coñecidas, ao principio con diferentes orixes, máis adiante centrándose en mulleres galegas xa falecidas.
A evolución do traballo e a resposta en redes sociais fixo que o reto se convertese nun proxecto de busca e divulgación de mulleres activas e valiosísimas en moitos ámbitos, na súa maior parte descoñecidas. Así, ao cabo do ano 2021, foron publicados 52 retratos de mulleres diversas. Científicas, escritoras, periodistas, artistas de diferentes disciplinas, activistas represaliadas, ou incluso traballadoras en ámbitos non asociados tradicionalmente á muller están representadas nesta escolma.
A exposición Mulleres Valentes conterá reproducións deses 52 retratos, así como varios orixinais e material adicional sobre o proceso creativo.
.
A imaxe que se escolleu como encabezamento da mostra é un retrato de Mamalola, avoa de Rosa de Cabanas. Foi escollida non só por motivos sentimentais, senón por ser un exemplo moi representativo de muller valente da galicia rural, nunca suficientemente recoñecida.