As actuacións nos centros de Arca e Ouzande realízanse o 1 de setembro e no de Ponte Ulla o 2 de setembro. A nova distribución das frecuencias está prevista para o 5 de novembro.

A Xunta de Galicia está levando a cabo un proceso de actualización da rede de Televisión Dixital Terrestre (TDT) que implica modificar algunhas das frecuencias polas que se reciben as canles de televisión.

No caso da Estrada, as actuacións previstas afectan aos centros de extensión de cobertura de Arca e Ouzande, nos que os traballos se realizan o 1 de setembro, e ao centro de Ponte Ulla, situado no Concello de Vedra e que tamén proporciona cobertura a determinadas zonas da Estrada, onde a actuación está prevista para o 2 de setembro.

A nova distribución das frecuencias está prevista para entrar en funcionamento o 5 de novembro.

Que deben facer os veciños?

Se a televisión continúa recibindo todas as canles con normalidade, non é necesario realizar ningunha actuación.

Se, unha vez realizado o cambio, deixa de recibirse algunha canle, será necesario realizar unha busca automática de canles no televisor ou no receptor da TDT.

Tras realizar esta busca, é posible que as canles aparezan nunha orde diferente da habitual, polo que será necesario volver ordenalas.

Se despois da nova sintonización continúa algún problema de recepción, especialmente no caso das instalacións colectivas das comunidades de veciños, pode ser necesario revisar ou adaptar a instalación da antena.

IMPORTANTE: A desaparición dunha canle tras o cambio non significa necesariamente que o televisor ou a antena estean avariados. O cambio de frecuencia fai que o televisor teña que volver localizar as canles.

Zonas que poden verse afectadas

Segundo os cálculos de cobertura facilitados pola Xunta de Galicia, o centro de Arca ten como mellor servidor diferentes entidades das parroquias de Arca, Codeseda, Nigoi, Souto e Tabeirós.

O centro de Ouzande presta cobertura, segundo estes cálculos, a entidades das parroquias de Guimarei, Lagartóns e Ouzande.

Pola súa banda, o centro de Ponte Ulla pode prestar servizo ás entidades de A Calzada, A Veiga, O Regueiro e Os Bieites, na parroquia de Arnois.

A relación facilitada pola Xunta identifica as zonas nas que estes centros constitúen, segundo os estudos de cobertura, a mellor opción de recepción. Non obstante, esta relación non é pechada, polo que pode haber vivendas situadas noutras zonas que tamén reciban o sinal destes centros.

Por este motivo, a recomendación é comprobar o funcionamento da televisión unha vez realizado o cambio, independentemente de que a vivenda figure ou non na relación de zonas facilitada.

As canles manteranse

O cambio non supón a desaparición das canles de televisión, senón unha modificación das frecuencias utilizadas para distribuír o sinal.

Nas novas frecuencias continuarán recibíndose as principais canles da TDT, entre elas TVE1, TVE2, Clan, 24 Horas, Teledeporte, Telecinco, Cuatro, Antena 3, La Sexta, TVG, G2, TVG UHD, FDF, Divinity, Neox, Nova, BeMad, DMAX, Energy, Mega, Boing e Trece, entre outras.

Máis información

Para consultar dúbidas relacionadas coa cobertura da TDT ou co centro emisor correspondente, está dispoñible o teléfono 881 866 388 e a web tdtgalicia.gal.